"Үткәннәрне яңартып" - Югары Норлат мәктәбендә эшләп килүче "Туган як тарихын өйрәнү" музеенда сакланган Бөек Ватан сугышы турындагы язмалар һәм тарихи экспонатлар белән танышу - сәяхәт кылу формасында буларак, Югары Нурлат библиотекасы планына кертелеп, шулай ук мәктәп укучылары һәм балалар бакчасына йөрүче әзерлек төркеме балалары катнашында оештырылды. Үзләрен кызыксындырган сорауларга бирелгән җаваплардан битәр, барысын да үз күзләре белән күреп, үз куллары белән тотып карау - балалар күңеленә күбрәк сеңеп калганга, музей җитәкчесе һәм укытучылар белән берлектә, төрле темаларга багышланган мондый сәяхәт кылуларны киләчәктә дә планга кертергә кирәк дигән уртак фикергә килдек.

"День без табака" - диспут с молодежью ( Тәмәкесез бер көн) - яшьләр белән диспут формасында тематик әңгәмә. Югары Нурлат китапханәсендә уздырылган  мөһим чарага чакырылган авыл яшьләре, шушы теманы яктырткан күргәзмә - викторина белән танышканнан соң, бу актуаль проблема турында үз фикерләре белән дә бик теләп уртаклаштылар. Сәламәтлеккә зур зыян китерүче тәмәкенең зарары экологик катастрофа тудыручы сәбәпләрнең берсе икәне белән дә хәбәрдар булган егетләр һәм кызлар, бер генә көн тәмәке тартмый тору да, планетаны агу сөременнән күпмедер дәрәҗәдә коткару булачагына басым ясап, бу темага сөйләшүләрне кабатлап торуның зарурлыгы белән килештеләр.

30 нчы апрель көнне Югары Нурлат авылы  китапханәсендә "Сугыш турында иң яхшы китаплар" - дип аталган актуаль темага багышланган патриотик сәгатькә мәктәп укучылары һәм авыл яшьләре чакырылган иде. Патриотик рухта уздырылган аралашу сәгате, һәркемдә зур кызыксыну уятканга, бик җанлы үтте. Әзерләгән күргәзмә - китаплардан тыш сугыш турындагы башка китаплар белән дә таныш булган яшьләр мәктәп укучыларын үзләре укыган китапларның эчтәлекләре белән таныштырып, кыю һәм батыр балалар булып үсү өчен, бигрәк тә малайларга, сугыш турында язылган китапларны күбрәк укырга киңәш иттеләр.

"Җиңү көне - сагышлы бәйрәм" - 8 нче май көнне Югары Норлат китапханәсе,  мәдәният йортында мәктәп укучылары һәм "Сугыш чоры балалары" булган ,бүгенге өлкән буын вәкилләре катнашында узган тематик сәгать, нәкъ шулай дип аталган иде. Гомумхалык бәйрәме - Бөек Ватан сугышында җиңүнең 74 еллыгы уңаеннан әзерләгән күргәзмә үзе дә бәйрәмгә килүчеләрне җәлеп итәрлек булып, әтиләрен сугыш кырында югалткан сугыш чоры ятимнәренең күңеленә хуш килерлек булды. Сугыш уты көйдергән җиребездә Бөек Җиңү турында хәбәр алынган көннән 74 ел вакыт узды. Әмма фаҗигале һәм героик бу чор вакыйгалары буыннар арасында рухи-патриотик бәйләнеш чылбырының какшамас бер өлеше булып, инде киләчәк буын хәтерендә мәңге сакланса иде, дип әйттеләр  бәйрәмгә килгән өлкән буын вәкилләре.

Югары Нурлат китапханәсендә инглиз халкының күренекле язучысы - мәхәббәт җырчысы - Уильям Шекспир иҗатына багышланган күргәзмә аның иҗаты белән "Ромео һәм Джульетта" трагедиясе аша таныш булган өлкән буын китап укучыларында да, хәзерге буын яшьләрендә дә зур кызыксыну уятты. Мәңгелек төшенчәгә ия булган мәхәббәт темасына телләр генә киртә булалмый, билгеле. Шуңа да, йөзләгән телләргә тәрҗемә ителгән Шекспирны укымаган, яки, ишетеп белмәгән халык юктыр. Күргәзмә белән танышу барышы да, соңыннан фикер алышу да, һәркемнең күңеленә хуш килерлек булды.